Elon Muskගේ කෘත්රිම බුද්ධි සමාගම වන xAI, සිය Grok AI සේවාව නීතිවිරෝධී අන්තර්ගත නිර්මාණය කිරීම සඳහා භාවිත කළ බවට චෝදනා කරමින් පරිශීලකයෙකුට එරෙහිව නඩුවක් ගොනු කර තිබෙනවා.
2026 ජූලි 14 වැනිදා ටෙක්සාස්හි උතුරු දිස්ත්රික් ෆෙඩරල් අධිකරණය වෙත ගොනු කළ මෙම නඩුවේ විත්තිකරු ලෙස දකුණු කැරොලිනාවේ පදිංචි Terry Wayne Harwood නම් පුද්ගලයෙකු නම් කර තිබෙනවා. ඔහු Grok භාවිත කරමින් ළමුන් සම්බන්ධ නීතිවිරෝධී ලිංගික අපයෝජන අන්තර්ගත සහ පුද්ගලයන්ගේ අවසරයකින් තොරව නිර්මාණය කළ ව්යාජ රූප සකස් කර ඇති බව xAI සමාගම චෝදනා කරනවා.
xAI සමාගම පවසන්නේ Harwood ව්යාජ අනන්යතා යොදාගෙන Grok ගිණුම් කිහිපයක් විවෘත කර, පද්ධතියේ ආරක්ෂක සීමාවන් මඟහැරීම සඳහා විශේෂයෙන් සකස් කළ prompts භාවිත කර ඇති බවයි. සාමාන්ය ඡායාරූප ඒවායේ සිටින පුද්ගලයන්ගේ අවසරය නොමැතිව නුසුදුසු රූප බවට පත් කිරීමට උත්සාහ කළ බවද නඩු ලේඛනයේ සඳහන් වෙනවා. මේවා තවමත් xAI විසින් ඉදිරිපත් කරන ලද චෝදනා වන අතර අධිකරණය මඟින් තහවුරු කළ කරුණු නොවන බව සැලකිල්ලට ගත යුතුයි.
මෙම පුද්ගලයා Grok භාවිත කළ ආකාරය තම සේවා කොන්දේසි සහ Acceptable Use Policy උල්ලංඝනය කිරීමක් බව xAI පවසනවා. පෞද්ගලිකත්වය උල්ලංඝනය කිරීම, සැබෑ පුද්ගලයන්ගේ රූප ලිංගික ස්වරූපයකට වෙනස් කිරීම සහ ළමුන් සූරාකෑම වැනි භාවිතයන් Grokහි නීති මඟින් පැහැදිලිවම තහනම් කර තිබෙන බව සමාගම සඳහන් කරනවා.
xAI අධිකරණයෙන් ඉල්ලා සිටින්නේ Harwoodට නැවත Grok හෝ වෙනත් xAI සේවාවක් භාවිත කිරීම සහ නව ගිණුම් නිර්මාණය කිරීම ස්ථිරව තහනම් කරන නියෝගයක් ලබාදෙන ලෙසයි. ඊට අමතරව සිදුවූ බව කියන නීතිමය හා කීර්තිනාම හානිය සඳහා මුදල් වන්දි, නීතිඥ ගාස්තු සහ අනෙකුත් වියදම් ලබාදෙන ලෙසද සමාගම ඉල්ලා තිබෙනවා.
xAI විසින් ඉදිරිපත් කළ සංඛ්යාලේඛන අනුව 2026 වසර තුළ නීති උල්ලංඝනය කළ බවට සැක කළ ගිණුම් 52,222ක් අත්හිටුවා ඇති අතර, ළමුන් සම්බන්ධ සැක සහිත අන්තර්ගත පිළිබඳ වාර්තා 73,604ක් අදාළ ඇමෙරිකානු ආයතනය වෙත යොමු කර තිබෙනවා. එම වාර්තා හේතුවෙන් අවම වශයෙන් අත්අඩංගුවට ගැනීම් 244ක් සිදුව ඇති බව සමාගම නඩු ලේඛනය තුළ ප්රකාශ කර තිබෙනවා. මෙම සංඛ්යා xAI සමාගමේම ප්රකාශයන් බවද සඳහන් කළ යුතුයි.
AI සමාගමක් තම සේවාව අනිසි ලෙස භාවිත කළ පරිශීලකයෙකුට සෘජුවම නඩු පැවරූ මුල් අවස්ථා අතරින් එකක් ලෙස මෙම සිද්ධිය සැලකෙනවා. ඒ අනුව ඉදිරියේදී AI සේවාවක් භාවිත කිරීමේදී නීතිවිරෝධී අන්තර්ගතයක් නිර්මාණය කළහොත් ගිණුම තහනම් වීම පමණක් නොව, අදාළ සමාගමෙන් සහ නීතිය ක්රියාත්මක කරන ආයතනවලින්ද නීතිමය ක්රියාමාර්ගවලට මුහුණදීමට සිදුවිය හැකි බව මෙම නඩුව පෙන්වා දෙනවා.
